Ben Viljoen verwelkom graad agts
Hoërskool Ben Viljoen was opgewonde om die graad agt uiltjies by die skool te verwelkom en ook die jaarlikse graad agt kamp aan te bied.
Hoërskool Ben Viljoen se graad agt uiltjies is amptelik op 14 Januarie by die skool verwelkom.
Met senuweeagtige gesiggies het hulle vir die eerste keer deur die skoolhekke gestap, maar dit het nie lank geneem voordat die onsekerheid plek gemaak het vir opgewondenheid en ’n gevoel van tuiskoms nie.
Vanjaar spog hulle boonop met splinternuwe Ben Viljoen Uiltjie-beffies – ’n simbool van trots en samehorigheid wat hulle met groot trots deur die jaar sal dra.
Na afloop van die opwindende Interhuis swemgala het die graad agt leerders Vrydag, 16 Januarie, aan hul jaarlikse graad agt kamp deelgeneem – ’n besondere ervaring wat die ideale afskop vir hul hoërskoolloopbaan gebied het.
Die kamp het gefokus op spanbou, karakterontwikkeling en die vestiging van nuwe vriendskappe.
Ná ’n dag vol gees en entoesiasme by die swemgala, het die leerders met groot opgewondenheid aan verskeie uitdagende en prettige aktiwiteite deelgeneem. Hierdie aktiwiteite is spesifiek ontwerp om samewerking, vertroue en deursettingsvermoë aan te moedig.
Die Uitvoerende Raad, tesame met onderwysers en kampfasiliteerders het die leerders begelei en ondersteun, terwyl daar ook sterk klem gelê is op Ben Viljoen se kernwaardes: respek, verantwoordelikheid, omgee, integriteit en lojaliteit.
Teen die einde van die kamp was dit duidelik dat die graad agts nie meer net individue was nie, maar ’n hegte groep wat gereed is om hul plek as volwaardige Ben Viljoen-uiltjies in te neem.
