Klouter Klitsies maak idiome ‘lewendig’
’n Kleurvolle Moedertaaldagviering by Klouter Klitsies het gewys hoe taalontwikkeling en verbeelding reeds van kleins af hand aan hand kan gaan.
Kleuterskool Klouter Klitsies het Internasionale Moedertaaldag op 20 Februarie op ’n besonder kleurvolle en kreatiewe wyse gevier.
Kleuters, personeel en ouers het saam Afrikaans en taalpret gevier.
Die vieringe het gefokus op die bevordering van taalbegrip en verbeelding, met kleuters wat aangemoedig is om soos bekende Afrikaanse idiome aan te trek. Die oorspronklikheid en moeite wat in die kostuums ingegaan het, het beslis beïndruk.
Onder die uitstaande uitbeeldings was idiome soos ‘Jan Tuisbly se karretjie’, “Dit reën katte en honde’, ‘’n Klein muis met groot ore’ en ‘’n Kat in die sak koop’.
Elke kostuum het die betekenis van die idioom op ’n speelse en verstaanbare manier uitgebeeld, wat taalontwikkeling by die jong leerders verder versterk het.
Die dag se verrigtinge het groot opgewondenheid ontlok en gewys dat leer reeds op ’n vroeë ouderdom kreatief en betekenisvol kan plaasvind.
Moedertaaldag by die kleuterskool was nie net ’n viering van Afrikaans nie, maar ook van kultuur, kreatiwiteit en kinderlike verbeelding – ’n dag wat beslis met groot glimlagte onthou sal word.
