AIM-kompetisie verwyder 1 835 baars uit Loskopdam
Met die vyfde AIM-kompetisie is daar weer suksesvol grootbekbaars uit Loskopdam verwyder en ’n inheemse boom geplant as deel van ’n groeiende bewusmakingsinisiatief.
Die AIM-kompetisie, wat daarop gemik is om die getalle van grootbekbaars, ’n verklaarde indringer-visspesie, te beheer, het op 28 Februarie 2026 by Loskopdam plaasgevind.
Sedert die kompetisie in 2022 begin is, word daar jaarliks gepoog om soveel moontlik baars uit die dam te vang en te verwyder, met vanjaar se poging wat weereens groot sukses behaal het.
Altesaam 1 835 baars is tydens die kompetisie gevang en uit Loskopdam verwyder.
’n Besondere tradisie van die kompetisie is ook voortgesit toe ’n inheemse boom op die terrein van Forever Resort Loskopdam geplant is. Vanjaar is ’n witmelkhoutboom geplant, geskenk deur Peet van Rensburg van die Tree Factory in Pretoria.
Die eerste graaf grond is simbolies gegooi deur die president van die Suid-Afrikaanse Hengel- en Vergooi Vereniging, Andries Maree, wat die AIM-kompetisie reeds oor jare heen sterk ondersteun.
Intussen is daar ook erkenning gegee aan ’n langstaande ondersteuner, André Booyens, wat vanjaar 41 jaar vier van betrokkenheid by hengelkompetisies by Loskopdam – ’n merkwaardige mylpaal in die plaaslike hengelgemeenskap.
• Die volle artikel en uitslae van die AIM-kompetisie kan in hierdie week se uitgawe van die Observer Daller gelees word.
