Pi-dag bring breinkrag na vore
Ben Viljoen-leerders wys hul breinkrag op Pi-dag, met Danelle Hall wat 226 desimale plekke van Pi memoriseer en die kompetisie wen.
Hoërskool Ben Viljoen se Wiskunde-departement het tydens Pi-dag hul geheue en wiskundige vaardighede tot die uiterste beproef.
Hoewel Pi-dag wêreldwyd jaarliks op 14 Maart gevier word – ’n datum wat verwys na die bekende wiskundige konstante Pi (3.14) – het die skool die vieringe op 16 Maart aangebied.
Hierdie unieke getal speel ’n sleutelrol in die verstaan van sirkels, meetkunde en selfs die heelal, aangesien dit die verhouding tussen ’n sirkel se omtrek en sy deursneë verteenwoordig. Pi strek oneindig voort met desimale plekke sonder enige herhaling, wat dit besonder fassinerend maak.
Om dié dag te vier, het die Wiskunde-departement ’n opwindende kompetisie vir leerders van graad agt tot 12 gereël. Deelnemers is uitgedaag om soveel moontlik desimale plekke van Pi te memoriseer en dit onder toetsomstandighede neer te skryf.
Die kompetisie het groot entoesiasme onder leerders ontlok en indrukwekkende prestasies is gelewer. Die wenners per graad was soos volg:
• Graad agt: Karmi de Klerk (87 desimale plekke).
• Graad nege: Lanel Coetzee (88 desimale plekke).
• Graad 10: Dahliah Levy (87 desimale plekke).
• Graad 11: Caylin Sadie (93 desimale plekke).
’n Spesiale gelukwensing gaan aan die algehele wenner, Danelle Hall (Graad 12), wat ’n merkwaardige 226 desimale plekke van Pi korrek kon weergee.
Die skool het hul trots uitgespreek oor al die deelnemers se ywer en deelname.
