’n Leeftyd in blou: Kolonel tree af
Ná meer as vier dekades in die SAPD sê kol. Marie Basson totsiens aan ’n loopbaan van diens, opoffering en gemeenskapsbou.
Deur die jare het sy haarself verder bekwaam deur studies en kursusse, insluitend trauma-berading – ’n vaardigheid wat sy gebruik het om kollegas te ondersteun ná traumatiese tonele.
Sy beskryf tonele waar kinders en bejaardes slagoffers was as van die moeilikste ervarings van haar loopbaan.
“Dit was vir my altyd swaar om daardie tipe tonele by te woon. Die geweld en lyding het ’n blywende indruk gelaat.”
Hoogtepunte en erkenning
Ten spyte van die uitdagings, was daar ook baie hoogtepunte. Vir kol. Basson was polisiewerk altyd ’n spanpoging.
“Jy bou mekaar op. As junior leer jy, en as leier lei jy ander op vir hul toekoms. Niemand bereik sukses alleen nie.”
Een van haar trotsste oomblikke was die ontvangs van ’n goue medalje vir 40 jaar diens – ’n seldsame prestasie in die SAPD.
“Dit was ’n droom wat waar geword het toe my bevelvoerder die medalje aan my oorhandig het. Dit bly vir my die kosbaarste van almal.”
’n Nuwe hoofstuk begin
Met haar aftrede voel kol. Basson nog nie heeltemal gereed om die hoofstuk toe te maak nie.
“Dit voel nog of ek net met verlof is,” sê sy glimlaggend.
Sy sien egter uit na hierdie nuwe fase van haar lewe, waarin sy meer tyd saam met haar man, kinders en kleinkinders wil deurbring. Sy beplan om stokperdjies soos visvang, naaldwerk en gholf weer op te neem, en saam met haar man die land te verken.
Steeds deel van die gemeenskap
Kol. Basson beplan om in Groblersdal aan te bly en haar man in sy onderneming te ondersteun, soos hy haar oor die jare ondersteun het.
Hoewel sy die uniform verruil vir ’n rustiger lewe, bly haar hart by die mense.
“Ek gaan my kollegas en die gemeenskappe die meeste mis. Die vertroue, die samewerking en die menslike kontak – dit was vir my die kern van my werk.”
Boodskap aan die gemeenskap
Haar boodskap is duidelik: “Werk saam met die polisie, hê vertroue in die stelsel en behandel beamptes met respek. Ons is daar om te help, maar ons is ook mense.”
Met ’n finale groet aan die Sekhukhune-distrik – veral Marble Hall, Groblersdal en Roossenekal – bedank sy die gemeenskap vir jare se ondersteuning, vertroue en respek.
“Ek saluut julle almal.”
Kol. Basson voeg by: “Vir die tyd wat ek beskikbaar was, het ek gehelp waar ek kon. Vandag is ek daar waar ek slegs kan uithelp met raad, maar as dit enigsins moontlik is, gun my ook my rus en tyd saam met my geliefdes.”
