Hoërskool Ben Viljoen: Interaktiewe Opedag lok groot belangstelling
Kleurvolle uitstallings en energieke Dallers het gesorg vir ’n onvergeetlike Opedag-ervaring by Hoërskool Ben Viljoen.
Hoërskool Ben Viljoen se Opedag, wat op 23 April plaasgevind het, het besoekers met ’n lewendige en feestelike atmosfeer begroet wat meer soos ’n karnaval as ’n tradisionele skoolgeleentheid gevoel het.
Van vroegoggend af het die skoolterrein gegons van energie en opgewondenheid, terwyl ouers en voornemende leerders vanaf 17:00 verwelkom is deur kleurvolle uitstallings, aktiwiteite en vriendelike gesigte. Die onderskeie stalletjies het ’n wye verskeidenheid vakuitstallings en vermaak aangebied, wat gesorg het dat daar vir almal iets was om te geniet.
Die Dallers het hul skool met trots ten toon gestel. Akademiese departemente het interaktiewe uitstallings aangebied waar besoekers eerstehands kon ervaar wat die skool bied, terwyl sport- en kultuurgroepe hul talente en prestasies uitgelig het.
Volgens die skool was een van die hoogtepunte van die dag die sterk gevoel van gemeenskap en samehorigheid wat oral sigbaar was. Leerders het met groot entoesiasme as ambassadeurs opgetree en besoekers welkom laat voel as deel van die Ben Viljoen-familie.
Die vrolike atmosfeer en groot verskeidenheid aktiwiteite het bygedra tot die unieke ‘karnaval’-gevoel wat deur die dag geheers het en ’n blywende indruk op besoekers gemaak het.
Die sukses van die Opedag word toegeskryf aan die samewerking en harde werk van personeel, leerders en ouers. Hoërskool Ben Viljoen het weereens bewys dat die skool nie net fokus op akademie nie, maar ook daarop om ’n dinamiese gemeenskap te wees waar leerders die geleentheid kry om hul volle potensiaal te bereik.
