Gromar se hoenders kraai van sukses
Gromar Landbou Akademie se gewilde hoenderprojek leer jong leerlinge waardevolle lewensvaardighede terwyl vars eiers weekliks verkoop word.
Die grondslagfase by Gromar Landbou Akademie se hoenderprojek groei van krag tot krag en bring daagliks groot opgewondenheid onder die jong leerlinge.
Wat as ’n praktiese leerinisiatief begin het, het vinnig ontwikkel in ’n geliefde deel van die skooldag.
Leerlinge is daagliks betrokke by die versorging van die hoenders – van kosgee en waterbakke volmaak tot die versameling van eiers. Hierdie aktiwiteite word nie net met ywer aangepak nie, maar bied ook waardevolle lewensvaardighede.
Die skool het onlangs hul fasiliteite uitgebrei en die hoenders word nou in ’n groter en veiliger hok gehuisves. Hierdie verbetering maak dit moontlik vir meer kinders om gelyktydig deel te neem en praktiese ervaring op te doen.
Die projek lewer reeds tasbare resultate. Die vars eiers wat deur die hoenders gelê word, word aan ouers verkoop, en die vraag groei steeds. Volgens die skool is daar reeds lede van die gemeenskap wat weekliks eiers aankoop – ’n duidelike bewys van die projek se sukses.
Die opwinding stop egter nie hier nie. Nuwe henne sal aan die begin van Mei by die projek aansluit, iets waarna beide leerlinge en onderwysers met groot afwagting uitsien.
Met sorg, betrokkenheid en entoesiasme as dryfkrag, is dit duidelik dat Gromar se hoenderprojek nie net opvoedkundig waardevol is nie, maar ook ’n voorbeeld stel van hoe leer en pret hand aan hand kan gaan. Soos die skool self sê: ’n beter hoenderlewe sal jy nêrens anders kry nie.
