Hoërskool Ben Viljoen se Lehani skitter op ATKV-verhoog
Hoërskool Ben Viljoen vier nog ’n kultuursukses nadat Lehani Benade se uitsonderlike spel by die ATKV DigiToneel met ’n brons toekenning beloon is.
Lehani Benade, ’n talentvolle graad 11-leerder van Hoërskool Ben Viljoen, het haar kreatiewe vernuf op die verhoog bewys toe sy aan die ATKV se DigiToneel deelgeneem het met die aangrypende produksie Rapsodie tussen die Rakke, geskryf deur Inamari Schoonraad van Inamari.
Die stuk vertel die verhaal van ’n sestienjarige meisie wat haarself tussen die stil rakke van ’n biblioteek bevind en deur middel van kletsrym haar innerlike wêreld begin verken. Die emosionele verhaal neem die gehoor op ’n reis deur temas van verlies, teleurstelling en selfontdekking, terwyl die karakter troos en inspirasie vind in boeke, anime en mites.
Lehani se vertolking het beïndruk met diepte, emosie en oortuiging. Sy het daarin geslaag om die komplekse karakter met sensitiwiteit én energie uit te beeld, iets wat die beoordelaars duidelik raakgesien het.
Haar harde werk en toewyding is beloon toe sy ’n brons toekenning vir haar spel ontvang het. Die produksie self is ook met ’n brons toekenning bekroon, wat die gehalte en kreatiewe uitnemendheid van die stuk verder beklemtoon.
