Mbombela-atleet kritiek na fratsongeluk

’n Geharde en superfikse 100-myl-atleet van Mbombela veg om sy lewe nadat ’n hoofslagaar tydens ’n fratsongeluk afgesny is.

Werner Oosthuizen was gisteroggend (14 Februarie) op pad om in die Nelspruit-reservaat te gaan oefen toe hy ernstig beseer is, berig Laevelder.

“Werries was omstreeks 06:00 besig om oor ’n palissadeheining te klouter toe die stomp waarop hy gestaan het, omval. Een van die vlymskerp palissadepunte het sy regterarm deurboor en die hoofslagaar afgesny,” vertel Damien Kühn, ‘n goeie vriend van Oosthuizen.

Drie vroue het hom swaar bloeiend langs die pad aangetref en hospitaal toe gehaas.

Sy swaer, Morne Green, sê ’n ambulanshelikopter is uit Johannesburg ontbied om Oosthuizen daarheen te vervoer.

“Slegte weer het die reddingspoging egter gekortwiek, en die helikopter moes noodgedwonge in Belfast land. Emer-G-Med het hom per ambulans van Mediclinic Nelspruit na Belfast vervoer, van waar hy vir noodbehandeling na die Sandton Mediclinic in Johannesburg oorgeplaas is.”

Toe Laevelder met Green gepraat het, is Oosthuizen pas teater toe geneem vir ’n noodoperasie om die gapende wond te heg.

“Hy het geweldig baie bloed verloor,” sê Green, wat sy toestand as kritiek beskryf.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.