‘n Groep van ongeveer 40 mense is al van 06:00 vanoggend af besig om voor die ingang van Potch Hospitaal te betoog.

Lede van verskeie vakbonde is ongelukkig oor veral die uitkontraktering van werkers. Volgens Mzukisi Jam, provinsiale voorsitter van HOSPERSA, probeer die unies al sedert 2016 om verskeie kwessies met die departement van gesondheid uitklaar.

“Hulle reaksie wys op hulle disrespek teenoor werkers. Al wat hulle hoef te doen is met ‘n werkbare oplossing vorendag kom,” het hy gesê.

Daar het gerugte die rondte gedoen dat die betogers mense keer om in die hospitaal in te gaan. Volgens Jam het hy ook die gerugte gehoor daarom het hy kom seker maak dat dit nie gebeur nie.

Met die Herald se aankoms was daar twee bande wat voor die ingang aan die brand gesteek is.

“Dit is maar net vir die koue. Ons keer niemand om in of uit die hospitaal te kom nie,” het een betoger gesê.

Die situasie is tans onder beheer en word deur die polisie gemonitor.