In die vroeë oggendure van Woensdag, 22 Januarie, ongeveer 01:30, het inwoners van Mohadin en Promosa se krag afgegaan. Inwoners het die probleem by die plaaslike munisipaliteit rapporteer.

Die munisipaiteit het in ‘n verklaring gesê dat ‘n skakelstasie in Stanleystraat in Promosa gebrand het.

’n Ondersoek het getoon dat die brand veroorsaak is deur indringers en diewe wat die stasie gevandaliseer het, wat tot die vernietiging daarvan gelei het. Boonop is nog ‘n mini-substasie in Promosa ook gevandaliseer.

Tans ervaar Mohadin ‘n algehele kragonderbreking, en sommige gebiede in Promosa word ook geraak.

“Tegnikuste van die JB Marks Plaaslike Munisipaliteit se elektriese afdeling is op die perseel en werk onverpoos om die krag te herstel. Gegewe die erns van die situasie, verwag ons om krag later vanaand te herstel.” Het die munisipaliteit in die verklaring gesê.