Gimmies se sportspanne het oor die afgelope vakansie verskeie toere bygewoon.

Die 1ste XV het in Riversdal aan die Oakdale rugby week deelgeneem. Volgens Regardt Kleingeld, direkteur van Rugby by Gimmies, het hulle twaalf 0/17s gevat om ondervinding op te doen.

“Dit was die moeite werd. Matthew Redelinghuys is gekies vir die Oakdale XV vir die week vir sy uitstaande vertoning in sy posisie,” het Kleingeld gesê.

Die 1ste XV het 26 – 5 teen Bredasdorp gewen, 29 – 24 teen Oos-Kus Gimnasium gewen maar het teen ‘n sterk Hoërskool Strand, 45 -21 die knie gebuig.

Die 0/14A, 0/15 A en B en 0/19B/C groep het Hansieweek toe getoer.

“Dit was die eerste keer dat ons tweede span toer en ook dat ‘n B span toer.

“Ek is trots op al die Gimmies wat getoer het en die skool se naam hoog gehou het. Al is dit ‘n herbou is ek bly hoe ons vorder. Klein stappies,” het Kleingeld verduidelik.

Gimmies se netbaldogters het tydens die vakansie aan die Menlo-toernooi deelgeneem. Die spanne het o.a. kragte teen Helpmekaar, Paarl Gim, Oranje Meisies en Durbanville gemeet.

Die senior seuns hokkie-spanne het aan die Keith Fairweather-hokkietoernooi in Pietermaritzburg deelgeneem. Die eerste hokkiespan wen al vier hulle wedstryde.