Lucy Verster, ’n gebore Potchefstromer, blaas nuwe asem in kindervermaak en opvoedkunde met haar aanlynkanaal, Klara Klets.

Met ’n sprankelende persoonlikheid, kleurvolle beelde en prettige storievertelling wen Klara vinnig die harte van kinders én ouers wat op soek is na positiewe, opvoedkundige aanlynvermaak.

Lucy het gematrikuleer aan Hoër Volkskool en ’n BA-graad in Kommunikasie aan die Noordwes-Universiteit voltooi, gevolg deur ’n honneursgraad in Opvoedkunde. Intussen het sy bemarking by Riverwalk Winkelsentrum gedoen. Vandag woon sy en haar man van 10 jaar saam met hul twee seuns van agt en vier in Rustenburg.

“My twee seuntjies is die inspirasie vir baie van my video’s,” vertel sy.

Die idee vir Klara Klets het ontstaan uit Lucy se sewe jaar as Afrikaanse onderwyseres by ’n Engelse skool. Sy het gesukkel om hulpmiddels te kry wat kinders se aandag vasvang, en tydens Covid, toe sy haar oudste seun by die huis moes help, was daar weer ’n tekort aan hulpbronne. Met haar onderwys- en bemarkingsagtergrond het sy besluit om self inhoud te skep en die musikant Len Muller gevra om die kanaal se temalied te skryf.

Klara Klets bied nie net stories en speletjies nie, maar ook reekse oor kinderveiligheid, waar kinders op ’n speelse manier leer hoe om hulself te beskerm. Ander video’s leer Duits en Engels aan en stel jong kykers bloot aan nuwe tale en kulture.

“Ek wou iets maak wat soos speeltyd voel, maar steeds belangrike vaardighede aanleer, of dit nou taal, vriendelikheid, nuuskierigheid oor die wêreld of veiligheid is,” sê Lucy.

Met haar opvoedkundige agtergrond verseker sy dat elke video vermaaklik én leersaam is. Hoewel Klara Klets reeds aandag trek op YouTube en sosiale media, bly dit ’n trots Suid-Afrikaanse projek, geïnspireer deur plaaslike stories, omgewings en kultuur.

Lucy werk tans as dokumentkontroleerder by Tiro Access en vervaardig Klara Klets in haar vrye tyd.
Klara Klets-video’s is gratis op YouTube beskikbaar, en luisterstories kan op Spotify geniet word.Kyk Klara Klets aanlyn:

YouTube: https://www.youtube.com/@KlaraKlets
Facebook: https://www.facebook.com/KlaraKlets01
TikTok: https://www.tiktok.com/@klaraklets