Die Potchefstroomgemeenskap bid saam vir die herstel van die 17 maande oue, Jana Steyn, wat tans in die intensiewesorgeenheid ná ’n fratsongeluk aansterk. Sy het 26 Augustus per ongeluk onder haar pa se pakkie op die gesin se plaas net buite Koster, beland. Die blondekoppie moes per helikopter van Potchefstroom na Midrand gevlieg word, waar sy Dinsdagaand ‘n operasie van vier ure lank in die Midrand Mediclinic ondergaan het. ‘n Klip is tussen haar skedel en haar brein verwyder.

Jana is tans nog onder verdowing maar sterk tans goed aan. Sy toon geen tekens van infeksie nie. Sy sal na haar herstel opvolg behandeling en operasies moet kry. Die stuk van haar skedel wat tydens die operasie verwyder is, sal oor ‘n paar maande herstel word en die moontlikheid is daar dat Jana in die toekoms plastiese chirurgie sal moet ondergaan om die letsels aan haar gesig te herstel .

Volgens Kelly Steyn, Jana se ma, het die ongeluk plaasgevind toe Jana saam met haar pa en boetie wou ry.

“My man en seuntjie het vir my en Jana gegroet met soene en drukkies en hulle was in die bakkie op pad om te ry, terwyl my dogtertjie huil sy wou graag saam haar pappa en boetie beeste toe gaan. Ek het vir haar gesê ons gaan skool toe sy moet saam my kom om gou diertjies kos te gee, ek het omgedraai om my skoene by die huis se deur te kry toe sy besluit om so vinnig as moontlik te hardloop om haar pa te probeer stop. Sy beland toe onder die bakkie en my man is oor haar, hy het nie geweet sy is naby nie want sy is mos by my… dit was ‘n kwessie van vier sekondes,” het Steyn vertel.

“Ek kan nie beskryf hoe dit gevoel het om daai prentjie van my kind se gesig te sien nie. Dit was die ergste oomblik van my lewe,” vertel sy.

Die gesin het onmiddellik hospitaal toe gejaag terwyl hulle aanhoudend gebid het.

“Die Here se hand van beskerming het oor haar gerus. Sy het asemgehaal en sy het geleef dit alleen is ’n wonderwerk,” sê Steyn.

’n Ambulans het die gesin naby Ventersdorp gekry en Jana oorgeneem. Haar pa het intussen langs die pad neergekniel en vir sy dogtertjie se lewe gebid. Jana is eers by Mediclinic Potchefstroom behandel en later na ’n hospitaal in Midrand oorgeplaas. Sy het ure in teater deurgebring waar haar skedel en ernstige gesigwonde behandel is. Volgens dokters het sy op ’n merkwaardige manier oorleef geen bene is gebreek nie, ondanks die feit dat die bakkie oor haar is.

“Die dokters kan dit nie glo nie. Al haar toetse wys goed. Ons glo sy gaan volkome herstel,” verduidelik Steyn.

Die familie sê hulle is oorweldig deur gebede, ondersteuning en hulp van familie, vriende en die breër gemeenskap. Hulle het ook hul dank uitgespreek teenoor die mediese span wat vinnig opgetree het.

“Ons voel hoe die aarde letterlik gons van gebede vir Jana. Dankie Here vir mense wat saam intree en bid sonder ophou,” het sy gesê.

Hoewel Jana se herstelpad nog lank gaan wees, glo haar ouers dat sy ’n lewende getuienis van God se beskermende hand is.

“God het sy voet neergesit en gesê die vyand het nie reg om Jana se lewe te neem nie,” het sy verduidelik.

Die familie het ook aangedui dat sommige van Jana se behandeling nie deur hul mediese fonds gedek word nie en dat vriende en gemeenskapslede ’n fondsinsameling begin het om te help. Mense wat kan help, kan by die Back-a-Buddy ‘n bydrae lewer. https://www. backabuddy.co.za/ campaign/liefste-janasteyn