‘n Motorfietsryer het matige beserings opgedoen nadat ‘n voertuig van agter in hom vasgery het.
Juandre Oelofse, ‘n lid van die Potch Kings motorfietsklub, het Dinsdagaand omstreeks 22:00 op die hoek van Nelson Mandela- en Rivierstraat by ‘n verkeerslig stilgehou toe ‘n voertuig hom van agter getref het. Hy was op pad huis toe ten tyde van die ongeluk.

Hy het gelukkig geen ernstige beserings tydens die ongeluk opgedoen nie, maar dit kon baie erger vir Oelofse gewees het. Volgens hom was van sy vriende in ’n kar in die baan langs hom waar hulle alles gesien gebeur het.

Hulle het aan hom vertel dat hy deur die lug gevlieg het nadat die voertuig hom getref het.

“Een van my vriende het net gebid, want ek wou blykbaar nie my bewussyn herwin nie. Maar toe my ander vriend aan my skouer vat en by my sit, het ek bygekom,” vertel hy.

Die bestuurder wat in Oelofse vasgery het, het dadelik uitgespring om hulp aan te bied.

“Hy het vir my gesê ek moenie bekommerd wees nie, hy sal alles uitsorteer. Hy het my die volgende oggend weer gebel om te vra hoe dit met my gaan. Hy is baie jammer. My “biker angels” was saam met my daai aand,” sê Oelofse.