Daar is groot dankbaarheid vir die heerlike reën in en om die stad, maar ongelukkig het swaar reën-, hael- en windstorms ook groot skade aangerig.
Nie net het reënwater deur huise gespoel nie, maar hael het aanplantings op plase vernietig, voertuie is ernstig beskadig en selfs afgeskryf en rukwinde het talle boomtakke in Potchefstroom afgewaai en selfs bome is ontwortel.
Oos van Potchefstroom is ’n hele mielieland van Kobus van Niewenhuizen onder spilpunt platgeslaan deur haelkorrels so groot soos snoekerballe.
‘n Inwoner van die Wilgeboomhoewes, Nico Gerber, sê baie huise op die hoewes is deur die wind beskadig.
“Die hele dak van my buurman se huis het afgewaai en baie mense wie se huise skade gekry het, is nie finansieel sterk nie.” Dieselfde huis se mure het ook gebreek soos wat die dak afgeruk is.
Op Facebook is daar ook ‘n video van ‘n doringboom wat ‘n huis se dak heeltemal vernietig het toe dit omgewaai het. Rudi du Toit van die Brandbeskermingsvereniging is tans besig met ‘n beraming van die skade. “Elke halfuur kry ek nog ‘n oproep oor skade wat deur die storms aangerig is,” sê hy. Enigiemand wat hulp kan verleen aan gesinne by die Wilgeboomhoewes kan Nico Gerber by 072 151 5566 skakel.
Daar word nog reën voorspel. Dit het sover 99mm vir November gereën, wat reeds meer is as die langtermyngemiddeld van 87 mm.
