Vanoggend (1 Julie) het daar ‘n simulasie-bomontploffing op die NWU se Potchefstroomkampus plaasgevind.

Verskillende rolspelers in die gemeenskap het deelgeneem aan die simulasie-oefening van die Skool vir Verpleegkunde. Die gemeenskap word versoek om rustig te wees, aangesien dit ʼn reuse samewerkingspoging tussen dié rolspelers was.

ʼn Bomontploffing is in die amfiteater nageboots met die hulp van die kampus se beskermingsdienste, die Suid-Afrikaanse Polisiediens se springstofeenheid en onderhandelingspanne, ER24, Tlokwe brandweerdienste, Potchefstroom Medi-Clinic en die Afrika Sentrum vir Rampstudies binne die Fakulteit Lettere en Wysbegeerte.

Verpleegkundestudente het die geleentheid gekry om deel te wees van die werklike, egte onderrig- en leerervaring, met ʼn sterk interdissiplinêre fokus op behandeling van pasiënte voor hulle na hospitale afgevoer word, in samewerking met paramedici, dokters, brandweermanne en die SAPD.

Hulle kon hul vaardighede op die versorging van beseerdes toepas, asook om voorkomende gesondheidsorg aan diegene wat nié beseer is nie, te voorsien. Die studente het in verskillende fases van die simulasie-oefening gewerk, soos onder meer in ʼn simulasiehospitaal.

Die simulasie-oefening is goed bestuur en alle rolspelers is deeglik ingelig.