Danksy die goeie harte van Canal Crossing winkelsentrum se kliënte het Potchefstroom Animal Welfare Society (PAWS) die afgelope week ‘n massiewe geskenk in die vorm van 500 kilogram hondekos gekry. Sodoende kan al die honger magies by PAWS vir ‘n ruk lekker aan die splinternuwe geure smul.
“Canal Crossing het jaarliks ‘n Letters to Santa-kompetisie om iets terug te gee aan ons kliënte. Vanjaar het Maureen Roestorff, Carina Engelbrecht, Marlize van der Walt en Elrise Pretorius wat ingeskryf het, besluit om nie iets vir hulself te kry nie, maar iets vir PAWS te gee. Die 500 kilogram kosskenking is aan niemand anders te danke as ons kliënte nie,” noem Elizna Leibbrandt, Canal Crossing se bemarkings- en kommunikasiebeampte.
“Ons het die briewe met die beste motiverings gekies en ons glo dit is Canal Crossing se hart om terug te gee aan die gemeenskap.” Volgens Leibbrandt het Cat Box Hyper ‘n groot bydrae tot hierdie inisiatief gelewer.
“Kliënte kon briewe skryf oor wat hulle van Kersvader wou hê vanuit ‘n spesifieke Canal Crossing winkel. Sodoende het Cat Box Hyper wat deel van die Canal Crossing winkelsentrum is, goedkoper hondekos gegee sodat die 500 kilogram teiken makliker bereik kon word,” noem sy.
