Die senior adjunkhoof van Hoërskool Die Wilge, mev. Rita Clarke, is deur die Suid-Afrikaanse Raad vir Opvoeders (SARO) as die top onderwyser in Noordwes aangewys.

SARO se fokus is om die status van die onderwysprofessie deur toepaslike registrasie te verbeter en die professionele ontwikkeling en inskerping van ‘n etiese kode vir alle opvoeders te bestuur.

Clarke het hierdie hoogstaande toekenning verwerf nadat sy vanaf 2020-2022 die meeste punte in drie kategorieë behaal het wat die professionele ontwikkeling van onderwysers meet. Sy het die voortgesette professionele onderwyserontwikkeling (CPTD) aktiwiteite voltooi om in aanmerking te kom vir hierdie toekenning.

Hierdie aktiwiteite sluit in selfgeïnisieerde-, skoolgeïnisieerde-, sowel as aktiwiteite wat SARO self onderskryf. Die hoofdoel hiervan is om op professionele vlak in die onderwys te groei.

“Dit is vir my ‘n baie groot eer. Ek is die enigste Potchefstromer in die top 5 en om die beste in die provinsie te wees, beteken baie vir my. Ek is baie bevoorreg,” noem Clarke wat al 21 jaar by Die Wilge skoolhou en ook vir 10 jaar die senior adjunkhoof-pos beklee.

Clarke gee ook natuurwetenskappe vir jaar 2 en persoonlike en sosiale welstand vir jaar 3 as onderwyser by Die Wilge, wat ‘n skool vir leerders met spesiale onderrigbehoeftes (LSOB) is. Sy noem dat dit belangrik is dat onderwysers gedurig verbeter en daarvan moet hou om te leer.

“Dit is belangrik om te groei en ek moedig onderwysers aan om ook aan die aktiwiteite deel te neem. My persoonlike siening is dat onderwysers nie altyd erken word vir die baie werk wat hulle insit nie. Hierdie toekenning is ‘n bewys dat onderwys baie belangrik is en dat harde werk raakgesien word.”