‘n 36-jarige plaaseienaar van Boschhoek, ongeveer 35km vanaf Potchefstroom in die rigting van Fochville op die N12, is gisteraand (Donderdag, 24 Augustus) deur een van sy eie Njala bokke gesteek. Die insident het glo gebeur toe die man wild wou vervoer.

Hy is weens beserings wat hy in die hierdie fratsongeluk opgedoen het oorlede.

Die man is na Potchefstroom gehaas vir mediese hulp. Nooddienste het die man halfpad tussen Potch en die plaas op die N12 ontmoet en die man probeer resussiteer, maar was onsuksesvol.

Fochville stasiebevelvoerder, Lt. Kol. Kgomotso Netshitangani het die voorval bevestig en genoem dat ‘n geregtelike doodsondersoek van stapel gestuur is.

Die man se familie moet nog sy liggaam identifiseer voordat sy identiteit bekendgemaak kan word.