Motoriste kan hulle gereed maak vir ’n skerp styging in brandstofpryse in April, met voorlopige beraminge wat toon dat petrol met meer as R2 per liter kan toeneem.

Volgens berekeninge van die Sentrale Energiefonds (SEF) kan Suid-Afrikaners vanaf 1 April 2026 aansienlik meer vir petrol en diesel betaal. Die voorspelling kom te midde van toenemende spanning in die Midde-Ooste wat wêreldwye oliepryse onder druk plaas.

Die SEF bereken daagliks die basiese brandstofprys op grond van internasionale oliepryse en die rand se wisselkoers teenoor die Amerikaanse dollar. Hoewel die staatsbeheerde energie-maatskappy nie amptelike brandstofprysvoorspellings publiseer nie, monitor ontleders die sogenaamde oor- en onderverhalings om te skat of pryse waarskynlik gaan styg of daal voordat die regering die finale aanpassings aankondig.

Volgens die jongste ramings wat Donderdag bekend gemaak is, kan 95-oktaan petrol met sowat R2.41 per liter styg, terwyl 93-oktaan petrol na verwagting met ongeveer R2.28 per liter sal toeneem. Diesel kan selfs harder getref word, met moontlike verhogings van tussen R4.40 en R4.50 per liter.

‘n Liter 93-oktaan petrol kan sodoende verbruikers moontlik R 22.47 uit die sak jaag.

Brandstofprysaanpassings tree elke maand om 00:01 op die eerste Woensdag in werking. Vir April beteken dit dat die nuwe pryse in die vroeë oggendure van 1 April van krag sal wees.