Na menigde klagtes oor die haglike toestand van paaie in Potchefstroom, het Potchefstroom Herald vroeër berig die situasie het ontaard in ’n ernstige veiligheidsrisiko vir motoriste en inwoners.

Jeanette Tshite, munisipale woordvoerder, sê die JB Marks Plaaslike Munisipaliteit het ‘n formele en funksionele stelsel in plek vir die rapportering en bestuur van slaggate.

“Inwoners kan slaggate deur die Munisipale Ontvangstoonbank sowel as via beskikbare kommunikasiekanale, insluitend selfone, rapporteer. Alle aangemelde gevalle word aangeteken en werkkaarte word sonder versuim uitgereik. Toegewyde spanne word ontplooi om hierdie verslae te hanteer, ondersteun deur ‘n gestruktureerde weeklikse slaggat-opknappingsprogram wat deur die Paaie- en Stormwatereenheid geïmplementeer word as deel van deurlopende padonderhoud.”

Sy gaan voort om te sê die munisipaliteit prioritiseer tans kritieke industriële en arteriële roetes, insluitend Jeppe-, Promosa-, Ross- en Mogolodipaaie, as gevolg van hul belangrikheid as sleutelvervoer binne die jurisdiksie van die JB Marks Plaaslike Munisipaliteit.

“Onderhoudsbedrywighede sal voortgaan na Potchefstroom se middestad, die Bult, Miederpark en Baillie Park. Daar moet beklemtoon word dat huidige intervensies op arteriële paaie gefokus is om maksimum impak met beskikbare hulpbronne te verseker.”