Inwoners van Kanaalweg in die Vyfhoek-area het Vrydagoggend, 24 April, ‘n onrustige begin van die dag beleef toe ‘n reuse boom in die vroeë oggendure, net ná middernag, omgeval het en die hele straat tot stilstand geruk het.

Die boom het reg oor die pad neergestort en nie net die verkeer ontwrig nie, maar ook ‘n heining sowel as verskeie munisipale kragdrade afgeruk. Aan die een kant van die straat was die pad reeds oorstroom ná dae se aanhoudende reën, terwyl die ander kant heeltemal deur die boom versper is. Dit het inwoners in hul erwe vasgekeer gelaat en boonop sonder krag.

Die brandweer het vinnig op die toneel gereageer en deur die nag gewerk om die reuse stam in hanteerbare stukke op te saag. Teen ongeveer 03:00 is daar daarin geslaag om ‘n smal opening te skep sodat voertuie weer kon deurbeweeg.

Teen vroegoggend, kort ná 08:00, het munisipale spanne oorgeneem om die res van die boom te verwyder en te begin met herstelwerk aan die beskadigde kraglyne. Intussen het inwoners self ook moue opgerol en ingespring om te help met die opruimingswerk, ‘n duidelike teken van gemeenskapsgees te midde van die ontwrigting.