‘n Staatmaker-onderwyseres by Woel en Werskaf-kleuterskool, Belinda Harmse, het haar 60ste verjaarsdag op ‘n besondere manier by die skool gevier toe ouers vir haar ‘n Checkers Sixty60-verjaarsdagpartytjie gereël het.

“Ek staan altyd in verbystering oor hoeveel moeite die ouers regtig doen. ‘n Mens weet jy word waardeer en is geliefd, maar hierdie was above and beyond. Ek is so geseënd,” noem juf. Belinda, wat op Vrydag, 8 Mei, verjaar het.

Juf. Belinda noem dat haar kinders by Woel en Werskaf haar “petrol” met drukkies gee om haar tenk vol te maak.

“Hierdie kindertjies se liefde is baie spesiaal. Dit is my veilige hawe hier by Woel en Werskaf.”

Sy is nou al 20 jaar ‘n onderwyseres by Woel en Werskaf en is al 38 jaar in die onderwys. Sy het ook al nasionale toekennings vir haar onderrig ontvang.

Hierdie hele week loop haar beker van dankbaarheid oor.

“My feesvieringe gaan nou al vir ‘n week aan. Ek het oor die naweek my 60ste eers gevier in Buffelsbaai by my dogters. Twee van my dogters is in die Wes-Kaap. Ek het my vieringe daar begin, omdat dit een van my gunstelingplekke op aarde is.”