Dit was ’n week van glans, trots en pure Volkie-gees by Hoër Volkskool, waar leerders hul merk gemaak het, op die baan, op die verhoog én in die kunswêreld.

Netbal-capping

Die skool se jaarlikse netbal-capping op 8 Mei het die toon aangegee vir ’n seisoen propvol belofte. In ’n aand gekenmerk deur styl en trots, is die eerste span amptelik aangekondig, ’n groep vasberade meisies wat gereed is om die seisoen met krag en passie aan te pak. Die energie was tasbaar en die verwagtinge hoog, met Volkies wat duidelik agter hul span staan.

Mnr. & Mej. Volkie 2026

Nie lank daarna nie, het die kollig geskuif na die verhoog tydens die formele loop van Mnr. & Mej. Volkie 2026. Finaliste het met elegansie en selfvertroue hul opwagting gemaak, in ’n aand wat herinneringe vir jare sal skep. Die tweede tema, “Beroemde paartjies”, het die gehoor behoorlik laat skaterlag en hul gunstelinge luidkeels ondersteun, ’n ware viering van Volkie-gees en samehorigheid.

Die eerste tema, waar deelnemers filmkarakters moes uitbeeld, het weer eens kreatiwiteit laat blom. Van superhelde tot sprokiesfigure en klassieke ikone, elke deelnemer het hul rol met oorgawe en flair vertolk, en gewys dat talent by Volkies geen perke ken nie.

Volkie op die verhoog

Intussen het Eduard Viljoen sy merk gemaak op ’n groter verhoog, met ’n plek onder die Top 30 by die Proscenium-dramakompetisie, ’n indrukwekkende prestasie wat beslis erkenning verdien. Volkies staan trots saam met hom en vier sy sukses.