Twee Potchefstromers, Helen en Elmarie Conradie, het Suid-Afrika se o.35 vrouespan by die onlangse Indoor Cricket Masters World Series in Engeland verteenwoordig, en as wêreldkampioene na Suid-Afrika teruggekeer. Suid-Afrika het hulle ou vyand, Australië, met 8 lopies in die eindstryd geklop vir ‘n glorieryke sege.

Dié toernooi het vanaf 21 – 29 Oktober in Birmingham plaasgevind. Suid-Afrika se vrouespan het vroeër vir die uitspeelrondte gekwalifiseer deur oorwinnings in die groepfase oor Australië, Nieu-Seeland en Engeland te behaal.

In die daaropvolgende wedstryde het hulle eers met Nieu-Seeland in die semi-finaal afgereken en daarna die verdedigende kampioen, Australië in die finaal geklop. Helen is na afloop van die finaal as speler van die wedstryd benoem, nadat sy 23 lopies teen ‘n treftempo van 255.56 behaal het.