Die NWU Kenneth McArthur Atletiekstadion gaan die komende naweek ‘n miernes van bedrywigheid wees, met beide die Laerskole en Hoërskole Noordwes Atletiekkampioenskappe wat gaan plaasvind. Die Laerskole-byeenkoms vind Vrydag, 1 Maart plaas, met die hoërskole-kampioenskappe wat op 2 Maart plaasvind.
Foto’s: Wouter Pienaar
Potchefstroom Gimnasium en Hoër Volkskool Potchefstroom se atlete is ook slaggereed vir hierdie provinsiale byeenkoms na goeie vertonings by die onlangse Dr. Kenneth Kaunda-byeenkoms. 44 van die 57 atlete van Potchefstroom Gimnasium wat Saterdag aan die Dr. Kenneth Kaunda-byeenkoms, deelgeneem het, gaan deur na die Noordwes Hoërskole Atletiekbyeenkoms.
Die volgende atlete het meer as 1 000 punte op die ABSA-tabel behaal: Lee-Ann Grobbelaar, Phemelo Molale, Karmen Fouché, Armand Willemse, Wiané Joubert, Riandi Boshoff en Lumka Gebengana.
19 van Volkies se atlete gaan die Dr. Kenneth Kaunda-streek hierdie komende Saterdag verteenwoordig. Dit sluit onder meer top atlete soos Cara du Preez, John van Wyk, Lara Rall, Dirk Crafford, Mardi Swart, Gerrit Muntingh en Janise Nell in.
