Die NWU speel darem vir die eerste keer in drie weke ‘n tuiswedstryd op die Fanie du Toit Sportgronde en hulle sal hoop om voor hulle tuisskare weer die tipe rugby te speel waartoe hulle in staat is.  Volgens afrigter Mokuena is die Maties-wedstryd een wat hulle eerder sal vergeet en hul fokus sal aanskuif na die komende Ikeys-stryd.  “Ons het baie foute gemaak en nie op die standaard gespeel wat ons stel nie.

Die ouens was baie teleurgesteld en ons gaan die druk in moeilike situasies baie beter moet verlig,” het Mokuena genoem. Die skrumskakel, Chriswill September, behoort weer terug in die span te wees, terwyl staatmakers soos Wian Conradie en Gideon van der Merwe weer hulle hande sal moet opsteek en ander aansteek om dieselfde te doen. Die Ikeys wat skade kan aanrig is Darian Hock en James Tedder, asook flank en kaptein, Josh Moon.  Die wedstryd tussen NWU en Ikeys skop om 18:30 af.