Drie van die belowendste jong atletiektalente wat Suid-Afrika by die Wêreld Landloopkampioenskappe in Aarhus, Denemarke gaan verteenwoordig, kom uit die waters van Potchefstroom. Robert de Villiers, Cara du Preez en Danielle Verster gaan in die groen en goud op Saterdag 30 Maart skitter.
In Aarhus, wat slegs ‘n uur se rit van Billund waar, die bekende Lego-hoofkwartier is, sal hierdie jong atlete hulle blokkies van sukses mooi teen van die top landloopatlete in die wêreld moet bou. De Villiers gaan in die junior mans-afdeling deelneem (10km) met Du Preez en Verster in die junior vroue-afdeling (8km).
Die ervare langafstandafrigter, Nollie Meintjies, rig steeds vir De Villiers en Du Preez af. Hierdie langtermyn verhouding werp vrugte af met albei atlete wat nou op landloopgebied SA se naam gaan hoog hou.

“Dit gaan moeilike toestande wees, want dit is gewoonlik meer modderig en glad in Europa hierdie tyd van die jaar. In ons land is daar gewoonlik meer stof, maar daar is ander elemente wat die atlete voor moet uitkyk en algeheel is die tye stadiger,” noem Meintjies.

De Villiers beaam ook hierdie feit en noem dat die moeilike kompetisie en nuwe toestande daartoe bydra dat hy graag eers ‘n plek in die top 25 sal wil behaal.

“Die plan is om die top 25 te haal en enige iets na dit sal dan ‘n bonus wees,” vertel ‘n opgewonde De Villiers.
Die 15-jarige Verster wat onder die afrigting van haar pa, Jean Verster, uitblink sal ook hierdie byeenkoms as ‘n verdere stappie in haar ontwikkeling as atleet sien, aangesien sy teen o.20 atlete gaan deelneem en waardevolle ondervinding sal opdoen.