Die 2019 o.15 Momentum Krieketweek wat vanaf 5-9 Desember in Oos-Londen plaasgevind het, was een van die bestes vir Noordwes in jare.
Noordwes, wat met plaaslike Volkies soos Corné Prinsloo, John van Wyk, Ludwich Schuld, Lunga May, Dewald du Plessis en Wendel Osuala gelaai is, het puik vertoon en vier van hulle vyf wedstryde gewen.
Noordwes het in hulle eerste wedstryd (tydkrieket) teen SWD op die eerste beurt gewen danksy ‘n puik 49 van Du Plessis, wat ongelukkig was om net-net op ‘n vyftigtal uit te mis. John van Wyk moker ook ‘n goeie 37 nie uit nie om NW op 197/6 te laat eindig. SWD is almal uit vir ‘n skamele 76. Hier het Die Wilge se Bathabile Masigo met 1/4 en Lunga May met 1/8 uitgeblink.
In die volgende wedstryd teen Boland moes albei spanne met ‘n onbesliste uitslag tevrede wees. Boland slaan 222/9 met Dewald Grové wat ‘n puik 109 vir Boland slaan. John van Wyk is NW se top bouler met 2/22. NW maak 171 almal uit met Corné Prinsloo wat die meeste lopies (42) bydra. Boland se Hennie Botha neem briljante boulsyfers van 8/50.
NW wys ook geen genade vir KZN nie en het die seuns van die kus met vyf paaltjies by Selborne College op die derde dag van die toernooi geklop. Prinsloo is weer in die lopies met ‘n vinnige 36 (26).
Van Wyk saam met Du Plessis bring Noordwes oor die lyn. Teen Mpumalanga behaal NW ‘n puik agt paaltjie oorwinning danksy ‘n puik 71 (56)* van KHS se MJ Mostert. In ‘n spannende wedstryd teen Noordelikes behaal NW ‘n 2-paaltjie oorwinning. Mostert dra ‘n goeie 46 by en Prinsloo neem 3/34 met die bal.
