Die jong Potchefstroomse tennisspeler, Mari-Louise van Zyl, het die afgelope maand haar talent in Nairobi, Kenia gewys toe sy die halfeindrondtes van die ITF Nairobi Junior Ope behaal het.
Hierdie toernooi wat vanaf 5-9 Julie plaasgevind het, is deel van die ITF Wêreld Junior Tennistoer waar van die top jong spelers in die wêreld aan deelneem.
Mari-Louise het in die halfeindrondte teen die Amerikaner, Cleo Hutchinson, met 3-6, 1-6 vasgeval. In die vorige rondtes het die Potchefstroom Gimnasium leerder met pragtige tennis haar pad na die top 4 oopgespeel.
In die eerste rondte het sy vir Kudzai Chapepa (Zimbabwe) met 6-1 6-1 gemaklik geklop, voordat sy die eerste gekeurde Abhilasha Bista (Nepal) met 6-2 6-1 verslaan het.
Hierdie sege was goed vir die selfvertroue en kwarteindrondte klop sy vir Nicoline Sartz-Lunde van Noorweë met 7-6,6-7, 6-3 in ‘n marathonstryd van drie stelle. Mari-Louise het ook bewys dat sy maklik kon aanpas op die kleibaan – iets wat Suid-Afrikaanse tennisspelers nie aan gewoond is nie.
Mari-Louise is tans 1435ste in die wêreld gekeur en as sy aanhou goeie tennis speel behoort sy vinnig op die ranglys te klim.
