Die Luiperds se o.15-span het geskiedenis gemaak toe hulle die Blou Bulle met 27-20 geklop het in die nie-amptelike eindstryd van die 2026 Afgriweek in Bethlehem.
Hierdie jong Luiperdspan, wat die toernooi onoorwonne afgesluit het, het vir niemand teruggestaan nie en in ‘n wipplankwedstryd vir die Blou Bulle gewys waar Dawid die wortels gegrawe het.
Die Bulle was op ‘n stadium met 20-17 voor met slegs ‘n paar minute oor, maar Angelo Pieters het die wendrie vir die Luiperds gedruk ná ‘n kruisskop van Juandré Malambo.
Die Luiperds het ook die Sharks met 10-5 geklop en die Valke met 20-0 ore aangesit.
Potchefstroom se verteenwoordigers in die span was Calell Pereira en Junior Milonga van Gimmies.
Volgens die Luiperds se o.15-afrigter, Dustin Wetdewich, is hy baie trots op sy span se vertoning en glo hy dat hulle selfs nog meer punte teen die Sharks en Valke kon aangeteken het.
“Dit is ‘n ongelooflike gevoel om ‘n klein unie soos die Luiperds te neem en die groot kanonne te klop. Ons het op tye baie goeie rugby gespeel,” sê hy.
“Die wedstryd teen die Blou Bulle was baie taai. Die ouens het uitstekend verdedig. Dit was vir ons belangrik om die oorwinning teen die Bulle te behaal.”
