Die 2026 Irene Seymore-netbaltoernooi by Hoër Volkskool Potchefstroom bereik vandag (Saterdag, 18 Julie) die pylvak, met die finale posisies tussen 12 skole wat bepaal sal word.
Tot dusver was die aksie uit die boonste rakke, met spelers van o14- tot o19-vlak wat alles uithaal om die onderskeie bekers in hierdie interskoletoernooi te lig.
Helpmekaar Kollege, Hoërskool Menlopark en Oranje Hoër Meisieskool is vanjaar van die uitblinkers op die baan.
Helpmekaar se o19-, o17- en o16-spanne is almal onoorwonne in die toernooi en boaan die punteleer. Menlopark is tweede in die o16- en o17-afdelings en boaan die punteleer in die o15-afdeling.
RHS en Hoërskool Monument se spanne is ook nog in aanmerking vir podiumplekke in verskeie afdelings.
Volkies en Gimmies se spanne moes ‘n paar moeilike wedstryde naelskraaps verloor en kon net nie die voortou teen die groter skole behou nie. Wanneer die spanne mekaar wel gepak het, was die passie, soos gewoonlik, hoog.
Die eerste spanne (o19) het ‘n rillerwedstryd gelewer, met Volkies wat met 26-25 op hul tuisbaan geseëvier het. By die o17’s het Gimmies hul buurskool met 20-13 geklop.
Die aksie kan hier gevolg word met die nuutste uitslae en bepalings.
Foto’s: Wouter Pienaar
