Die oud-Potch Volkie, Arno Jacobs, het die afgelope Sondag ‘n groot mylpaal behaal toe hy as krieketskeidsregter in sy eerste internaionale eendagwedstryd gestaan het.
Jacobs het sy debuut op die Wanderers op 27 September gemaak in die Pienkdag-eendagwedstryd tussen Suid-Afrika en Australië. Hy was konsekwent met sy beslissings en kan sy kop omhoog hou na ‘n goeie debuut. Hy het saam met die voormalige Engelse toetsspeler, Richard Illingworth, in die middel gestaan.
Jacobs bly tans in die Oos-Kaap en verteenwoordig die Oostelike Provinsie se Skeidsregtersvereniging.
Hy is bekend as ‘n uitstekende skiedsregter op plaaslike vlak en is vanjaar as die Skeidsregters se Skeidsregter van die Jaar by die gesogte Krieket Suid-Afrika-toekennings aangewys. Voor sy eendagdebuut het hy alreeds in 14 T20 internasionale wedstryde gestaan.
Voordat hy skeidsregting betree het, was hy ook ‘n topklas speler op skolevlak vir Volkies, waarna hy toe sy krieket verder op provinsiale vlak voorsgesit het. Hy het se eersterangse eendagdebuut in die 1994/95 seisoen gemaak en vir 18 jaar vir verskeie spanne insluitend Noordwes en die Oostelike Provinsie (Warriors) verteenwoordig. Hy was bekend as ‘n linkerhandse kolwer wat in die middelorde gekolf het. Hy het 144 eersterangse wedstryde gespeel met ‘n kolfgemiddeld van 38.08 en ‘n hoogste telling van 218*.
Arno se ouer broer, Stefan, was ook in Volkies en het ook eersterangse krieket in die 90’s gespeel.
