Die Vaal se geliefde sanger, Refentse Morake van Vereeniging, was vanoggend weer in die kollig maar die keer nie vir sy mooi stem nie, maar omdat hy glo beheer oor sy motor verloor en in die vroeë oggendure deur ‘n inwoner van Potchefstroom se muur gebars het.

Die muur is erg beskadig, maar gelukkig is niemand beseer nie. Die eienaars van die woning het omstreeks 02:40 wakker geword toe hulle polisiesirenes gehoor het. Hulle het toe uitgevind dat hul woning se muur in die slag gebly het. Dit het glo hard gereën toe die ongeluk gebeur het.

‘n Polisiewoordvoerder het bevestig dat die ongeluk gebeur het en dat Refentse op die toneel om verskoning gevra het. Geen klag is teen hom ingedien nie, aangesien hy en die eienaars van die huis reeds ‘n ooreenkoms bereik het.