VEREENIGING. – Inwoners van Kowiestraat in Drie Riviere kla dat hulle al sedert die naweek sonder krag sit nadat ’n kragpaal in die buurt ontplof het.   Volgens Charmain Grobler, ’n gemeenskapsaktivis, is die probleem al male sonder tal by die Emfuleni Plaaslike Munisipaliteit aangemeld. Ten spyte daarvan is inwoners glo al vir die afgelope vier dae sonder krag.   Volgens Grobler is daar buiten die ongerief wat dit veroorsaak siek mense in die buurt wat van suurstofmasjiene afhanklik is. Sy meen die situasie is tans onuithoudbaar.   “Drie Riviere is die wyk van die Emfuleni Plaaslike Munisipaliteit wat die meeste geld vir die munisipaliteit inbring. In plaas van om na inwoners in hierdie gebied om te sien is die munisipaliteit besig om hul alies aan ons af te smeer,” het Grobler Dinsdag driftig aan Vaalweekblad vertel.   Daleen Venter, raadslid vir Drie Riviere, sê die probleem al 17 keer by die betrokke afdeling aangemeld. Sy sê: “Die paal het vermoedelik Vrydagoggend net na 04:00 ontplof. Die probleem is die eerste keer omstreeks 05:30 deurgegee.Omstreeks 07:00 het die paal weer geskiet en gekap en toe is nog meer huise af. Daarna is die probleem talle kere weer deurgegee.” Inwoners het teen die tyd wat die berig gepubliseer is steeds vir iemand om uit te kom.