Inwoners van laekoste-behuisingskema ly onder gebrekkige instandhouding
Riool wat opstoot, waterlekke wat nie reggemaak word nie, geboue wat kraak en die gevaar staan om in mekaar te tuimel, vullis wat nie gereeld verwyder word nie. Dit is maar 'n paar van die probleme wat inwoners van 'n laekoste-behuisingskema in Duncanville mee worstel.
VEREENIGING. – Volgens Elize Aucamp, ‘n raadslid vir Wyk 45 van die Emfuleni Plaaslike Munisipaliteit, is die gebrek aan instandhouding die onderliggende probleem weermee die 60 arm gesinne van die Sonhof Woonstelle mee worstel.
Die woonstelblok in Springboklaan behoort aan die Emfuleni Plaaslike Munisipaliteit en word deur die munisipaliteit se departement vir fasiliteite bestuur, maar talle mense voel dat meer gedoen kan word om die plek te onderhou.
Waterlekke wat nie reggemaak word nie het glo oor ‘n lang tydeperk die fondasie van die gebou verswak en die boonste vloere van meeste van die vleuels van die woonstelgebou is glo reeds onveilig verklaar.
Volgens Aucamp gaan die eienaarskap van die woonstelkompleks oor die lange duur aan die inwoners self oorgedra word.
“Die oomblik as jy besit neem van die gebou – of die woonstel – is jy self verantwoordelik vir al die instandhouding. ‘n Mens kan nie van hierdie inwoners verwag om te red wat die Emfuleni Plaaslike Munisipaliteit nie eers kan red in hierdie stadium nie,” meen Aucamp.
Sy het aangedui dat sy ‘n skrywe aan die Gautengse LUR vir behuising gaan rig oor die kwessie.
