As die Suid-Afrikaanse Weerdiens se voorspelling reg is, gaan inwoners van die Vaaldriehoek vanaf more (Vrydag) behoorlik bibber van die koue.

Volgens die weerdiens beweeg twee winterweerstelsels hierdie week gelyktydig oor die land.
Buiten groot koue kan dit ook sneeu, swaar reën en moontlike vloede in sekere dele van Suid-Afrika veroorsaak.

‘n Kouefront het die Wes-Kaap reeds vandag getref, wat met reën en sterk wind gepaard gaan.
Die weerdiens voorspel ook sneeu oor die Drakensberge, die hoogliggende gebiede van die Vrystaat, sowel as oor die Oos- en Wes-Kaap.

Die kouefront sal teen more (Vrydag) in Gauteng en Mpumalanga inbeweeg en die kwik beduidend laat daal.
In Gauteng is koue in Augustus en September nie ‘n ongewone verskynsel nie. Dit het selfs al in dié maande van sekere jare in die Vaaldriehoek gesneeu – soos in Augustus 1962, September 1981 en Augustus 2012.

Hoewel daar nie in dié stadium sneeu vir die Vaaldriehoek voorspel word nie, sal dit tog te lekker wees om weer vir ‘n slag sneeumanne in ons agterplase te kan bou!

Hierdie sneeufoto’s is in Augustus 2012 in die Vaaldriehoek geneem: