Kapings in Drie Riviere: Die polisie wis van niks
Sosiale media is aan die gons oor ‘n groep mans wat glo ’n skrikbewind in Drie Riviere voer en mense probeer kaap. Die polisie sê egter hulle dra geen kennis hiervan nie.
VEREENIGING. – Die polisie se woordvoerder in Vereeniging, kapt. Fikile Funda, het Dinsdagmiddag (31 Augustus 2021) by navraag aan Vaalweekblad gesê hy kan slegs kommentaar lewer oor voorvalle wat wel by die polisie aangemeld is en deur die polisie ondersoek word.
Volgens hom was daar die afgelope twee dae nie ’n enkele motorkaping of enige pogings tot motorkapings aangemeld nie.
Hy kon dus nie kommentaar lewer oor hierdie aangeleentheid nie.
Volgens boodskappe wat op sosiale media gesirkuleer word ry die mans ’n Toyota Yaris met ’n leerlingbestuurder-plakker op die linkerkantse hoek van die agterruit.
“Die modus operandi is dat die voertuig in die pad stop en die flikkerligte aanskakel word. Wanneer jy probeer om verby die voertuig te beweeg is daar ’n man wat teen jou deur skop. Die oomblik wat jy stop en uitklim, klim drie ander mans, gewapen met messe en ’n moersleutel in die voertuig, val jou aan en probeer die voertuig steel,” lui die een boodskap.
Dit is onbekend wie die outeur van die boodskap is maar meeste mense stuur dit net aan.
Volgens een van die boodskappe het die insident in Generaal Hertzogweg en in Drie Riviere Oos plaasgevind.
Volgens ‘n ander boodksap het dit in Houtkopweg in Drie Riviere plaasgevind.
Ben Almero van die veiligheidsmaatskappy National Crime Assist Vaal, wie se besondederhede op een van die boodskappe verskyn, kon nie onmiddelik met Vaalweekblad praat nie.
Hy was besig om vure te blus en het gevra dat ons hom oor twee uur terugskakel.
