Bonika Gouws bly al 12 jaar naby die gevaarlike kruising in Ericsonstraat, CE1 (naby die Vuma Vulstasie) waar dit met Playfair-boulevard kruis.

“Ek het sy kop op my skoot gehou en hom probeer bystaan terwyl ons sy dogter probeer kontak en ons vir die nooddienste gewag het. Die man wat in die ongeluk beseer was, mnr. Robert Calvert, was in erge pyn.

“Hy het heeltyd in Engels gesê dat hy nie asem kry nie en dat hy besig was om dood te gaan. Ek het vir hom bly bid en gesê dat hy okay sal wees, maar hy is later in die hospitaal oorlede,” vertel ‘n hartseer Bonika.

Sy help oor die afgelope 12 jaar gereeld tydens sulke ongelukke by die kruising, maar voel nou dat die tyd aangebreek het om die kruising veiliger te maak.

Bonika glo dat spoedhobbels moontlik die oplossing kan wees. Sy wil graag weet hoe mens te werk moet gaan wanneer inwoners ‘n beswaarskrif wil laat opstel en laat teken met ‘n versoek om spoedhobbels by die betrokke kruising te laat aanbring.

Sy bedank ook namens die oorledene se familie die ER24-personeel vir hul toewyding op die ongelukstoneel, asook Johan Boshoff-insleepdienste wat gehelp het om mnr. Calvert se dogter in die hande te kry.

“Ek dink aan wyle mnr. Calvert se gesin in die hartseer tyd en hoop en bid dat daar binnekort spoedhobbels sal wees om sulke ongelukke te help verhoed,” sluit Bonika af.

* Vaalweekblad sal die raadslid in die gebied vra om die moontlikheid van spoedhobbels onder die munisipaliteit se aandag te bring sodat ‘n behoorlike ondersoek gedoen en planne vir beveiliging van die pad geïmplementeer kan word.