Dit is brandseisoen en die AfriForum-buurtwag het op verskeie geleenthede gehelp om brande in die omgewing te bestry. Die buurtwag het onder meer hulp verleen by Stols Vervoer om ’n brand onder beheer te bring.

Die AfriForum-tak het na die afsterwe van Izak Lessing, voormalige voorsitter van die tak, op ’n besondere wyse ’n laaste eer aan hom bewys.

Die trekkergrassnyers waarmee die tak steeds gras sny was Lessing se inisiatief en die buurtwag het hom veral na aan die hart gelê, daarom het die taklede hierdie trekkers, met buurtwagligte op, gebruik om in ’n konvooi na sy huis te ry waar hulle blomme aan sy vrou oorhandig het.

Verder het die tak ook die Helpende Hand gehelp om die noodvoorrade wat ingesamel is vir inwoners van KwaZulu-Natal na Roodepoort te verskuif, dit sal van daar versprei word na die dele waar dit nodig is.

“Die AfriForum-tak in Sasolburg is altyd bereid om te help, hulle is regte steunpilare in die gemeenskap en ons waardeer hulle,” sê Alta Pretorius, distrikskoördineerder vir die Mooirivier.

Die gemeenskap word aangemoedig om by dié AfriForum-tak betrokke te raak om sodoende ’n daadwerklike verskil te maak: SMS “Sasolburg” na 45344 (R1).