VEREENIGING. – Vyf spelers van die Kiewietkub (Drie Riviere Aftree-oord) het onlangs aan die tweede SA Senior Akademie Jukskei Toernooi 2022 deelgeneem en die Vaaldriehoek se naam hoog gehou.

Basie en Dina Stander, Deborah van der Walt en Saadjie Zelie het Oos-Vrystaat verteenwoordig en Peet Muller die provinsie Limpopo.

Hierdie toernooi is vanaf Maandag 21 Februarie tot Vrydag 25 Februarie in Kroonstad op Jukskeipark (die hartland van SA Jukskei), aangebied.

Drie-en-dertig spanne, onder andere 7IG Ontwikkelingspanne en 132 spelers (sonder reserwes en beamptes) het aan die toernooi deelgeneem..

Die Maandag is die toernooi geopen deur die onderskeie vlae te hys. Tydens die toernooi is spanwedstryde, driespel, dubbels en weer spanwedstryde gespeel.

Vir die Vrydag se vertoonwedstryde om 08:00 is Dina Stander vir die SA Senior Akademie se Vrouespan gekies en Peet Muller en Saadjie Zelie onderskeidelik vir die SA Senior Akademie Meriete Span 4.

Na afloop van die vertoonwedstryde het die toernooi voortgegaan met die laaste spanwedstryde en die toernooi is met ‘n prysuitdeling afgesluit.

Adri Muller (Limpopo) en Tom Prins (KZN) is spelers wat ook aan alternatiewe SA Jukskeitoernooie deelneem. Basie en Dina Stander, Peet en Adri Muller, Deborah van der Walt en Tom Prins het elk ‘n oorkonde van die Kiewiet Ontspanningsklub ontvang ter erkenning vir verdienstelike en strategiese j ukskeispel en die verryking van die klub se jukskei-spelvaardigheid.

Dié spelers is daarvoor bedank dat hulle die klub op Provinsiale en/of SA kompetisievlak met die status van “ambassadeur” verteenwoordig het.

Jukskei is ‘n sport vir oud en jonk. Daar is tans klubs in Vereeniging (Kiewiet Jukskeiklub), Vanderbijlpark (Eikeklub) en Parys (Mimosklub).

************************************************************************************************