VEREENIGING. – Lede van die Vereeniging for Change-beweging wat sakelui, taxi-bestuurders, straatsmouse en inwoners van die stad verteenwoordig, het Vrydag (20 Mei 2022) aan die protesoptog in Vereeniging se strate deelgeneem.

Hulle dring aan op dienslewering deur die polisie en die Emfuleni Plaaslike Munisipaliteit.

Die optog het omstreeks 08:00 voor die Nandos-restaurant in Voortrekkerstraat begin. Betogers het van daar af na die Vereeniging-polisiestasie beweeg waar hulle ‘n griefskrif met eise aan verteenwoordigers van die polisie en die Emfuleni Plaaslike Munisipaliteit oorhandig het.

Volgens Shaheen Choonara, een van die organiseerders van die optog, is inwoners ongelukkig oor die stand van infrastruktuur in Vereeniging, die gebrek aan dienslewering, die gebrek aan polisiëring, haweloses en dwelmgebruikers in sakekern en die skrootmetaalhanderlaars in die stad.

“Ons wil graag die dorp regruk. Op die oomblik betaal ons met geld uit ons eie sakke om, slaggate, straatligte, padmerke en verkeersligte reg te maak. Ons moet boonop self die kragstasies oppas en water en riool vloei tans deur ons strate,” sê hy.

Volgens Mpho Khambule van die Vereeniging for Change-beweging is inwoners ook ongelukkig oor die standaard van polisiëring in die middestad.

“Die polisiestasie en distriksbestuur wat verantwoordelik is vir gemeenskapsveiiligheid moet ons as die gemeenskap die diens gee wat ons verdien. Ons veiligheid en sekuriteit is ons mensregte,” het hy in ‘n toespraak voor die polisiestasie gesê voordat hy ‘n griefskrif aan genl. Zodwa Molefe van die polisie oorhandig het.