Sasolburg spog met jong, talentvolle hengelaars
SASOLBURG. - Meandro Pieters van die Hap en Kap Hengelklub het vanaf 3 - 5 Oktober 2022 aan die 0/13 SAVOF toer deelgeneem wat by Bloemhofdam aangebied was.
Daar was 25 seuns en dogters hengelaars wat deelgeneem het. Meandro het die SAVOF A span verteenwooridg en in die algehele 11e plek geëindig met 34 vis – 31,820kg (waaronder ‘n baber van 7,2kg).
Die algehele wenner was HJ Knoetze van die SA Skole span A met die swaarste sak en meeste vis oor die drie dae ( 59,155kg – 56 vis). Die SAVOF A span eindig in die 2de plek, SAVOF B span in die 3de plek en die SA skole span A in die 1ste plek.
Die Hap en Kap Hengelklub het ook sy September maand-kompetisie by Kollege Plaas, Vaaldam naby Villiers gehou.
Dit was ‘n snikhete dag met die wind wat taamlik sterk gewaai het by tye. Dit het egter nie die 11 hengelaars gestuit nie.
Daar was 98 vis met ‘n gewig van 59,55 kg ingeweeg vir punte. (46 karp, 2 graskarp, 18 moddervis, 9 babers en 23 kleinbek geelvis).
Die penkoppe (O/13) mannetjies het weer hul staal gewys. Meandro Pieters het die lootjie gewen met sy baber van 0,460kg.
Nog ‘n penkop, Michael Meyer, het vroeg die oggend die oë laat rek toe hy ‘n bielie van ‘n graskarp land wat die skaal laat kreun het op 6,150kg, sy swaarste vis tot dusver in kompeterende hengel.
Hy het na die einde van die dag se hengel 6 vis ingeweeg (8,935kg) en was ook die wenner in die afdeling.
Marius Crous (meester) het met die louere weggestap vir die dag met 25 vis (15,7kg).
Marius het ook die swaarste karp vir die dag ingeweeg (2, 015kg), swaarste moddervis deur Hennie Greyling (1,610kg) en kleinbek geelvis deur Leon Meyer (0,405kg).
Die klub se volgende kompetisie is op 22 Oktober by Leeuplaas.
.
