MIDVAAL. – Die munisipale bestuurder van die Midvaal Plaaslike Munisipaliteit, Anton Groenewald, sê Midvaal vervaardig deesdae ‘n derde van die verbruikersgoedere wat in die provinsie vervaardig word.

Groenewald het so gesê tydens die ‘n kort toespraak wat hy gelewer het toe die burgemeester van die munisipaliteit, rdh. Peter Teixeira, vroeër vandeesmaand verslag gelewer het oor wat sy administrasie in ‘n jaar se tyd bereik het.

Die munisipaliteit het ‘n aanloklike bestemming geword vir vervaardigers en word deur sommiges as die “Midrand van die suide” bestempel.

“Die idee van ‘n “Vervaardig in Midvaal”-etiket is iets wat ons graag sal wil sien en mettertyd wil ontwikkel,” sê Groenewald.

Groenewald meen as elke Suid-Afrikaner weet dat die produkte wat hulle gebruik in die Midvaal Plaaslike Munisipaliteit vervaardig word – en dat ten minste ‘n derde van die produkte (wat in Gauteng vervaardig word) van hier af kom – dit sal help om die munisipaliteit beter te posisioneer en bewustheid te skep oor die moontlikhede wat die munisipaliteit as vervaardigingsomgewing bied.