Groot kommer het sedert omstreeks 16:00 Donderdagmiddag (2 Februarie) geheers nadat ‘n 2-jarige dogtertjie in Vereeniging se sakesentrum verdwyn het. ‘n Plasing waarin die uiters bekommerde pa mense gevra het om op die uitkyk vir sy dogtertjie te wees, het sedert gisteraand die rondte op Facebook en Whatsapp-groepe gedoen.
Volgens aanvanklike gerugte is sy naby Finbond Bank deur twee mans by haar ma gegryp.
Vaalweekblad het vanoggend met die dogtertjie se pa gepraat. Hy sê hy is pas ingelig dat sy opgespoor is maar hy is nog in die proses om uit te vind wat presies gebeur het. Sy is tans by ‘n plek van veiligheid, hoewel die pa nog nie veel meer inligting het nie.
Hierdie is ‘n ontwikkelende berig. Vaalweekblad sal meer inligting verskaf soos wat nuwe feite aan die lig kom.

OPVOLG:

Dit het intussen aan die lig gekom dat die tweejarige dogtertjie nie Donderdag deur rowers in die sakesentrum by haar ma gegryp is nie, maar deur karwagte na veiligheid geneem is omdat hulle oor haar welstand bekommerd was. Die kleinding is tans veilig en goedversorg, en die gesin hanteer die situasie intern. Vaalweekblad volstaan dus hiermee en gaan nie verder oor die voorval verslag doen nie.