VEREENIGING. – Personeel en ouers van ‘n bekende kleuterskool in Vereeniging is baie bekommerd nadat dit verlede week aan die lig gekom het dat twee vroue in ‘n wit bakkie voor die kleuterskool stilgehou en foto’s van die geboue en die kinders wat in die speelterrein was, geneem het.
Personeel van die kleuterskool het die oggend gesien dat die bakkie voor die kleuterskool stilgehou het en dat die twee vroue “baie selfoonfoto’s” neem.

“Toe van ons personeel na hulle toe stap om te hoor waarom hulle foto’s neem, het die bakkie dadelik weggery. Dit maak nie sin vir ons nie. Niemand het ons toestemming gevra om foto’s te mag neem nie,” sê die skoolhoof.
Hoewel daar dalk ‘n onskuldige verklaring vir die vroue se optrede was, wil die skool graag met die vroue in verbinding tree om ‘n verduideliking te kry.

“Die voorval het baie verdag voorgekom, maar ons wil niemand onder verdenking plaas nie. Ons MOET egter weet wat aangaan. Daar is deesdae soveel gerugte van kinders wat gesteel en ontvoer word dat mens nie sulke optrede kan aanvaar nie. Om foto’s van ons kleuters op die speelterrein te neem, word absoluut nie toegelaat nie,” sê die hoof.

Indien die betrokke vroue hierdie plasing lees en daar dalk ‘n onskuldige rede vir hul optrede was, kan hulle Vaalweekblad anoniem by 083 246 0523 kontak om te verduidelik.