Verdriet hang nog soos ‘n donker wolk oor Sasolburg en Vaalpark nadat twee bekende broers, Nicky en Michael Pretorius, Woendagaand in ‘n baie ernstige motorongeluk betrokke was.
Nicky (23) het Donderdagoggend aan sy beserings beswyk en Michael veg tans om sy lewe in ‘n Bloemfonteinse hospitaal.
Wyle Nicky was die bestuurder van The Bar With No Name in Vaalpark en baie bekend en geliefd in die Vaaldriehoek.

Die boeties se pa, mnr. Nicky Pretorius (senior), het gister gesê Michael se koors is kommerwekkend hoog.
“Bid asseblief vir ons kind,” vra hy.

Familie en vriende het vanoggend kranse en foto’s gaan plaas op die ongelukstoneel op die R57-roete langs die Eco Park.
* Vaalweekblad dra namens die Vaaldriehoekse gemeenskap ons innige simpatie oor aan Nicky Senior en Lena met die verlies van “klein” Nicky, en ons bid saam dat Michael sy stryd gaan wen en gesond gaan word.

Vaalweekblad is die afgelope dae in verbinding met die seuns se pa, wat ons op hoogte hou van Michael se toestand. Die gesin gaan tans deur ‘n verskrikilke moeilike tyd en Vaalweekblad wil hulle nie nou steur vir ekstra inligting nie. Ons sal later die week ‘n vollediger berig plaas.