Suksesvolle Kersfees in Julie
Die Rotariërs het 'n suksesvolle fondsinsamelingsoggend gehou ten bate van hul Winter Angels projek.
VANDERBIJLPARK. – Dis nie aldag dat mens in Suid-Afrika Kersversierings en geskenke in die middel van die winter raakloop nie.
Saterdag, 1 Julie was die uitsondering. Die Rotariër Klub van Vanderbijlpark het ʼn spesiale Kersfees in Julie oggend gehad om fondse in te samel vir hul Winter Angels projek.
Die klub se president, Adri Roos het almal, die spesiale gaste van die Rotariër Klub van Northcliff inkluis, verwelkom en ʼn oorsig oor die Winter Angels projek gegee.
Hierdie projek, waar breiers ywerig die hele jaar mussies, truie, speelgoed en serpe brei vir minderbevoorregtes, gaan elke jaar van krag tot krag.
Hulle het hierdie jaar alreeds heelwat gebreide goed aan 12 instansies uitgedeel en op Mandela-dag gaan hul gebreide speelgoed, musse en serpe uitdeel.
Soos President Adri Roos tereg sê: “ʼn Mens kan sommer sien elke steek is met liefde gebrei.”
Die meeste van die breiers, van hulle is tot in die Weskaap, is ouer mense wat dit geniet om te brei met die wete dat hul handewerk ʼn verskil maak.
Alhoewel van die breiers hul eie wol koop, is daar vele wat nie die wol kan bekostig nie.
Die Kersfees in Julie oggend was gehou om geld in te samel om wol aan te koop vir die projek.
Die oggend het feestelik begin met die saal wat mooi getooi was met Kersfees versierings en Kersboompies op elke tafel.
Daar is lekker geëet alvorens die bekende Franz Geldenhuys almal met sy sang en wyshede geïnspireer het.
Sy meesterlike vertolking van, onder andere, Sprokie vir ʼn Stadskind, Stille Nag in Frans en Frank Sinatra se I did it my way het vir hoendervleis oomblikke gesorg.
Franz se boodskap dat elkeen elke dag die liefde, vrede en vreugde van Kersfees moet uitdra het ook die kol getref.
“Doen dinge op jou eie manier, maar moenie ander oordeel nie,” het hy gesê en almal iets gegee om oor na te dink, naamlik: bou jy mense op of tap jy hul energie?
Hy het ook goeie raad van sy ouma gedeel. Sy het altyd gesê voor enige groot besluit of as jy wonder of jy iets moet doen al dan nie, “maak eers tee en gaan lê vir 10 minute.” Goeie raad inderdaad.
