Inwoners van die Vaaldriehoek en omstreke het laasnag en vroeg vanoggend, 10 Julie, behoorlik gebibber nadat ‘n kouefront die gebied getref het.
Temperature van so laag as minus 3 grade is in Vanderbijlpark aangeteken.
Oewerbewoners van die gebied langs die Vaalrivier tussen Sasolburg en Vanderbijlpark rapporteer dat hulle minus 6 grade hier gemeet het.

Dit blyk dat omliggende plekke soos Deneysville nog kwaaier deurgeloop het. Die kwik het tot minus 7 in dié dorpie by die Vaaldam gedaal!
Verskeie inwoners het foto’s op Vaalweekblad se Facebook-groep geplaas van hul waterfonteintjies en voëltjiebakke wat verys het. Gebiede in die Suide van Johannesburg, Alberton en Heidelberg, het vanoggend met ‘n dun lagie sneeu of kapok gespog.

Sover Vaalweekblad kon vasstel, het die Vaaldriehoek laasnag die koudste temperature tot dusver hierdie winter aangeteken.

Een van Vaalweekblad se aanlyn-lesers, Frieda Muller, het hierdie tong-in-die-kies kommentaar gelewer: “Ek sit vanoggend voor die ‘heater’. As dit nog kouer word, sal ek hom moet aanskakel!”
(Frieda, met die huidige hoë kragtariewe beveel ons aan dat jy nog bietjie uithou tot ons by minus 10 uitkom!).